Jón Gerald á minn stuðning

Frábært viðtal við Jón Gerald í Silfrinu áðan. Hann heldur áfram baráttu sinni og er tilbúinn að leggja til atlögu við Baugsveldið á þeirra eigin vígstöðvum. Opna lágvöruverðsverslun og gefa fólki kost á að sýna í verki að það vilji ekki þá spillingu sem fylgt hefur Baugi og þeim sem því fyrirtæki stjórna.

Nú ríður á að fólk átti sig á samtakamætti sínum. Það er ekki nóg að beina reiði sinni að Alþingi og ríkisstjórn, það þarf að losna undan því áhrifavaldi sem Baugsmenn hafa beitt í baráttu sinni við að koma landslýð á hausinn. Þeir hafa getað treyst á að fólk láti budduna ráða, en budda þeirra helst full með aurunum okkar. Jón Gerald býður valkost og viðskipti sem ekki hafa á sér spillingarstimpil síðustu ára.

Ég vona að Íslendingar taki vel á móti honum og styðji hann í verki, en láti ekki fara fyrir honum eins og Ómari Ragnarssyni sem fyllti Laugaveginn af eldhugum sem létu sig svo hverfa þegar kom að kjördegi.  

Ef dæma má viðtökur þessarar fréttar á Eyjunni hef ég trú á að "hann þarna þessi Sullenberger" nái að knésetja Baug og allt það hyski. 

Hyggst stofna lágvöruverðsverslun

Athugasemdir

[Hallgerður Pétursdóttir (IP-tala skráð) 14.12.2008 kl. 15:06]

Ég hef ekki áður séð annað eins og Silfrið nú held ég að eitthvað sögulegt fari að gerast hjá okkur..Við höfum talað um bananalýðveldi? Það er meiri sannleikur í því en mig hefur órað fyrir.

[Ragnhildur Kolka, 14.12.2008 kl. 15:52]

Ég veit ekki hvort við séum svo miklir bananar, held frekar að við séum dálitlir sveitalubbar sem byggja allt sitt á trausti og trúnaði. Refsiréttarlöggjöf byggir á því að enginn ætli sér að gera illt. Þeir sem brotið er á eiga erfitt með að sækja sinn rétt. Hingað til hefur sú byrði verið borin af einstaklingum. Hér erum við að horfa upp á að hópur manna gerir út á þjóðina (okkur) og gerir það í skjóli þess að réttarkerfið gaf þeim grænt ljós til athafna. 

Davíð Oddson áttaði sig á hvers konar menn voru þarna á ferð. Honum var legið á hálsi fyrir að hindra ORKA hópinn í að taka yfir Fjárfestingabanka atvinnulífsins. Agnes Bragadóttir gerði því máli góð skil á sínum tíma í Morgunblaðinu. Þessum sömu mönnum tókst svo að leggja nánast allt bankakerfið undir sig og við finnum nú fyrir því á eigin skinni hverjar afleiðingarnar eru. Þjóðargjaldþrot.

Alþingi og ríkisstjórn þurfa að taka dómskerfi annarra landa sér til fyrirmyndar við endurskoðun laga hvað þessi mál varðar til að koma í veg fyrir að slíkir fimleikar endurtaki sig.

 Nú dugar ekkert elsku mamma.