Draumar og "menn"

Í samanburði við mikilfengleika himinhvolfsins eru mennirnir smáir.

En hve smáir eru þeir? Kannski væri sanngjarnara að spyrja hve smáir geta þeir orðið? Svarið er einfalt; þeir geta orðið svo smáir að stærstu, jafnvel einu draumar þeirra snúist um aðild að ESB. Menn eru dæmdir af draumum sínum. Til að uppfylla alla möguleika sína þurfa draumar mannanna að vera stærri en þeir sjálfir. Aðeins þannig ná þeir að máta sig við sköpunarverkið sem umlykur þá.

Er draumur um ESB aðild allt sem hægt er að ætlast til af "æðstu" skepnu jarðar?

Athugasemdir

[Baldur Hermannsson, 16.5.2009 kl. 12:11]

Þá er himininn asklok ef ESB er æðstur drauma.

[Ragnhildur Kolka, 16.5.2009 kl. 12:57]

ESB hjörðin sér ekki himininn. Ozonlagið er það lengsta sem hún getur teygt hugann og þá aðeins í gegnum trú sína á að allt fari til fjandans ef við komumst ekki inn í ESB.

[Baldur Hermannsson, 16.5.2009 kl. 13:04]

Það þarf að kenna þessu liði kosmólógíu. Jörðin, Sólkerfið, Vetrarbrautin, Grenndarhópurinn, Alheimurinn, Fjölheimurinn. Hvernig varð þetta allt til? Hvers vegna er allt eins og það er? Þegar menn fara að hugsa í ármilljörðum í stað kjörtímabila, þá fyrst er einhver von til þess að hugurinn víkki. En fram að þeim degi sjá þeir bara ESB og halda að miðja Vetrarbrautarinnar sé í Brúsel.

[Kolbrún Hilmars, 16.5.2009 kl. 13:15]

Stundum má efast um þessa "æðstu" stöðu  mannsins - ekki síst þegar hann hagar sér eins og læmingjarnir.

[Ragnhildur Kolka, 16.5.2009 kl. 13:19]

Þetta er tilvalin uppástunga. Legg til að þú takir að þér kennsluna.

[Ragnhildur Kolka, 16.5.2009 kl. 13:25]

Rétt hjá þér Kolbrún: -  læmingjahegðunin er frum-eðlishvöt, það er þegar menn fara að hugsa út fyrir hana sem þeir verða "æðri".

Bjargarleysið sem skín í gegnum aðildaráráttuna er afturhvarf til til frumhegðunar. 

[Baldur Hermannsson, 16.5.2009 kl. 13:33]

Þetta er skemmtilega viðeigandi samlíking hjá Kolbrúnu. Ég sá nýlega grein í Fréttablaðinu eftir Guðmund Andra. Samkvæmt þeirri grein eru "allir" komnir í ESB, og Ísland verður að flýta sér inn í hópinn.  ESB snýst ekki bara um hagsmuni, heldur snýst ESB um að vera með, taka þátt, leggjast ekki í einangrun heldur láta sig hverfa inn í hópinn og gera eins og hinir.  Þannig hljóðaði nú læmingjaprédikun Guðmundar Andra.

[Ragnhildur Kolka, 16.5.2009 kl. 23:12]

Kolbrún er með alla ventla í lagi, en ég hef eytt deginum í garðvinnu og brá mér síðan í bíó.

Allir frjálshugsandi menn ættu að taka sér tíma til að sjá mynd bloggvinar míns, Sigurgeirs Orra um Alfreð Elíasson og Loftleiðaævintýrið. Af því verður enginn svikinn.