"Ferska og fríski"

Það er aðeins farið að slá í glamúrinn sem "Gleðistjórnin" lofaði að bjóða upp á fyrstu dagana. Loforð um nýja tíma eru nú að taka á sig hrumleika ellinnar. Aldursforseti þingsins fengin til að veita forystu. Vá, ferskleikinn í fyrirrúmi. Og ekki tekur betur við þegar forystusauður rauðgrænni er dreginn fram. Maðurinn sem um árabil hefur verið ímynd forneskjunnar. Þessi kreppa ætlar ekki að fara mjúkum höndum um okkur.

Nýjabrumið fólst í kynhneigðinni og um tíma var slegið upp í fyrirsögnum í heimspressunni um þessa hýra stjórn; "Lesbisk stewardesse skal redde Island" sagði í Extrabladinu með flennu mynd að flugfreyjunni. En Jóhanna fékk ekki að njóta sérstöðu sinnar sem fyrsti samkynhneigði forsætisráðherrann í heiminum mjög lengi. Haldið ekki að forpokaðir frændur okkar í Noregi hafi verið fyrstir til að eiga samkynhneigðan forsætisráðherra. Og ekki lengra síðan en 2002. Þar með er ferskleikinn fokinn. En skyldi Norsurum eða yfirleitt nokkurri annarri lýðræðis þjóð nokkurn tíma hafa hugkvæmst að binda framkvæmdavaldið við dómsvaldið með lögum Guðs og manna?

Og enn fellur kusk á flibbann. Gleðistjórnin sem ætlaði að taka á pólitískri spillingu vill hefja hreinsunarátakið á pólitískum brottrekstri. Davíð Oddsson skal rekin hvað sem það kostar og um að gera, áður en skýrslan um störf Seðlabankans og viðvaranir hans til ríkisstjórnar er birt. Óttinn við hvað skýrslan ber í sér er greinilega lögum og siðviti sterkari.

Hatur er illur húsbóndi.

Nýtt Ísland; Nýtt RÚV!

Með tilliti til umræðunnar, sem nú fer fram um að embættismenn, ráðherrar og allir sem með vald fara segi af sér, legg ég til að ALLIR STARFSMENN RÚV segi af sér. Allar stöður auglýstar og gerð verði grein fyrir starfsferli (cv), ættartengslum og flokkshollustu á umsóknareyðublaði.

Vald frétta - og dagskrárgerðarmanna hefur ekki fengið tilskylda umfjöllun í fjölmiðlum. Kannski ekki svo skrítið, því þetta er fólkið sem stýrir umfjölluninni. Innhverf umfjöllun þeirra byggir því að mestu á því að klappa á bak hvers annars.

Fjölmiðlafólk hefur verið ötult við að benda á ábyrgð annarra en hver er ábyrgð fjölmiðlamanna? Hvernig standa þeir undir þeirri ábyrgð? Er það með því að flytja okkur fréttir og fréttaskýringar sem falla að þeirra persónulegu sjónarmiðum? Ætti ekki umfjöllun fjölmiðla að leitast við að greina frá atburðum (hér heima og erlendis) samkvæmt því sem sannreyna má ekki þeim spuna sem við erum sífellt mötuð á af áróðursmeisturum og álitsgjöfum.

Hvernig væri að beina kastljósinu að vinnubrögðum þeirra sem taka sér dómsvald, en eru víðs fjarri þegar ábyrgðar á vinnubrögðum er krafist.

Góð byrjun, Obama

Hinn nýi guð mannkynsins hefur nú tekið við keflinu. Með nýja von, nýtt upphaf; já heimurinn endurfæddist í dag, þegar Obama lét svo lítið að upplýsa heimsbyggðina um að "Vér erum tilbúinn að leiða á ný". Mannkynið allt féll á hné og grét af gleði.

Svei mér þá ef þetta byrjar bara ekki vel hjá Obama. Kolvetnisfótspor hans, fyrsta dag embættisferilsins hlýtur að ylja Dr. James Hanson, einum helsta sérfræðingi Nasa í loftlagsmálum, óþyrmilega um hjartarætur. Fyrir aðeins tveimur dögum lét Hansen þau orð falla að "Barack Obama hefur aðeins 4 ár til að bjarga heiminum" (greinilegt að Hansen veðjar ekki á að Nancy Pelosi standi við orð sín). Nú gildir að hafa hraðar hendur, því heimurinn er að sökkva.

Í dag fengum við að sjá upphafið af því ferli. Líkur eru leiddar að því að innsetningarhátíðin bæti litlum 500 milljónum punda af CO2 út í andrúmsloftið. Þá er tekið tillit til þeirra 600 einkaþotna sem kljúfa munu loftin blá til D.C. og skilja eftir >25 milljón pund af CO2. Einkabílaumferð til D.C. mun bæta andrúmsloftið um 265.483.000 pund og fjórfættir lögregluliðar munu losa um 400 pund út um afturendann. Að öllum líkindum munu um  575 milljón pund af CO2 losna í tengslum við hátíðarhöldin. Ekki lítil afköst það.

Það verður áhugavert að sjá hvernig nýi Orku og umhverfismálaráðherrann klórar sig út úr þessu dagsverki; hvort honum takist það áður en kjörtímabilið er á enda. 

Af hverju að binda sig við Gaza?

Fundur í Háskólabíó í dag undir kjörorðinu "ÞJÓÐARSAMSTAÐA GEGN FJÖLDAMORÐUNUM Á GAZA" sýnir enn og aftur að annað hvort vita menn ekki hvað þjóðarmorð er eða þeir stunda vísvitandi áróður fyrir hönd Hins múslimska bræðralags og það væri þá ekki í fyrsta skipti.

Hvað er það sem gerir þessa deilu fyrir botni Miðjarðarhafs svona áhugaverða - eða ætti maður kannski að segja; áhugaverðari fyrir vestræna fjölmiðla og almenning en aðrar deilur, átök eða stríð? Því óneitanlega birtist verulegur halli á fréttaflutningi, yfirlýsingum og mótmælafundum, þessari deilu í vil. Frá 27/12 hefur enginn fréttatími farið í loftið án þess að um þessi átök Ísraela og Hamas-liða sé fjallað. Dyggilega er tíundað hve margir óbreyttir borgarar hafi látið lífið. Vissulega er mannfall gríðarlegt og skelfing og ógn sem almenningur á Gaza upplifir hrikaleg. En Ísraela heyja stríð gegn Hamas-liðum sem skýla sér á bak við konur og börn. Óhjákvæmilega verða þau fyrir barðinu á þessum hernaði. Börn kannski frekar en annar almenningur því helmingur þjóðarinnar er á barnsaldri.

Miðað við athyglina sem Gaza-deilan hin nýjasta hefur fengið mætti ætla að friður ríkti um alla heimsbyggðina utan þessarar litlu landræmu. En svo er ekki, því miður. Tveimur dögum áður en upp úr sauð á Gaza hófst blóðug fjöldamorðahrina gegn saklausum borgurum í austur Kongó. Á jóladag og annan í jólum voru 620 menn, konur og börn söxuð í spað í þorpskirkjum í þessum landshluta af flokkum uppreisnarmann sem kalla sig Lord´s Resistance Army (LRA). LRA er trúarlegur bastarður sem vill koma á ríki byggðu á Boðorðunum tíu, einhvers konar kristin útgáfa af Sharíalaga-ríkinu sem Hamas vill koma á á Gaza, Vesturbakkanum og öllu Ísrael.

Samkvæmt Mannréttindavaktinni og vefsíðunni resolveuganda.com er líklegt að mannfall á þeim tíma sem liðinn er frá jólum, í þessum tveimur átökum sé svipað, þ.e. >1000. Munurinn liggur í því að í Kongó er stríðið háð gegn almennum borgurum. fólkið er saxað niður eða höfuðkúpur þess brotnar og börnum er rænt til burðar herfangs og til kynlífsþrælkunar. Enginn fundur hefur verið auglýstur hér gegn þessum fjöldamorðum á saklausum borgurum. Umfjöllun er nánast engin í fjölmiðlum, hvorki hér á landi eða annars staðar. Í Bandaríkjunum er hallinn í fjölmiðlaumræðunni Hamas/LRA þegar leiðrétt hefur verið fyrir fjölda fallina borgara 202/1. Sami leiðréttingarstuðull á umfjöllun um Gaza átökin/Uganda er 409/1 og umfjöllun um SÞ-skóla árásina/kirkjumorðin 807/1. Hvers vegna er líf afrískra borgara svona lítils metið á Vesturlöndum að fjöldamorð á þeim þykir ekki einu sinni tíðindum sæta? Ekki bara líf borgara Kongó heldur líka líf almennings í Uganda, Ruwanda og Súdan.

Líklega kemur margt til, en efst í hugann kemur skýring um að gyðingahatur leynist þar á bakvið; and-semitismi vinstri sinnaðra Evrópubúa og hreint gyðingahatur múslima. Aldagamalt hatur sem kristallast í orðum Hezbolla-leiðtogans Hassan Nasrallah: "Safnist gyðingar allir saman í Ísrael sparar það okkur ómakið við að elta þá uppi um alla heimskringluna". Það þýðir ekkert fyrir menn að reyna að slá ryki í augu fólks og segja að Hamas, systursamtök Hezbolla, viðurkenni Ísrael. Hamas er bókstafstrúar hópur sem vill útrýma öllum gyðingum. Landið skiptir minnstu máli, herferðin stendur gegn gyðingum. Gaza fékk sjálfsstjórn árið 2005 og ísraelskir hermenn voru sendir til að fjarlægja alla landnema af ströndinni. Hamas vann kosningarnar sem fylgdu í kjölfarið. Engin uppbygging hefur átt sér stað síðan, önnur en uppbygging vopnabúrs. Jafnvel gróðurhúsin sem auðmenn keyptu af Ísrael og gáfu palestínskum almenningi voru lögð í rúst. Hins vegar hefur eldflaugaskeytum rignt yfir á ísraelskt land allar götur síðan.

And-semetismi er landlægur í Evrópu. Það þurfti ekki stofnun Ísraelríkis til að kveikja þann neista. Bál haturs í garð gyðinga hefur brunnið frá því á 12. öld. Fyrir síðari heimstyrjöldina þurfti Hitler ekki að hafa fyrir því að snúa upp á handlegg Muftans af Jerúsalem til að fá hann með í útrýmingarherferðina gegn gyðingum. Sem betur fer var her nasista stoppaður af í Norður-Afríku áður en hann náði alla leið til Ísraels. 

Nú berast endalausar fréttir af brennum bænahúsa gyðinga víða um Evrópu; Frakkland, Holland, Bretland, Belgia standa þar fremstar annarra "menningaþjóða". Eldsprengjum er kastað inn á Starbucks kaffihús vegna þess að einhverjir bandarískir gyðingar eiga þar hlut, sama má segja um Texco sem stofnað var af gyðingi. Gyðingar eru barðir til óbóta á almannafæri. Æstur múgur hrópar slagorð gegn gyðingum sem fela í sér að þeir eigi enn heima í "ofninum". Fjöldagöngur eru farnar um helstu stórborgir álfunnar - París, London, Madrid, Róm - þar sem göngumenn hrópa slagorð til stuðnings intifada, jihad og "lengi lifi Hamas". Vinstri flokkarnir í Frakklandi hafa nú opinberlega stillt sér upp við hlið múslimskra stuðningsmanna Hamas. Kommúnistar, Græningjaflokkurinn og Trotskýistar hafa radikaliserað hreyfinguna. Sósíalistaflokkurinn sem slíkur hefur enn ekki lýst opinberlega yfir stuðningi. En þessi friðþæging vinstri aflanna lýsir afstöðu sem aðeins verður rakin til and-semitisma.

Á Íslandi er þessi sama alda að rísa. Undirbyggð af fjölmiðlum sem aðeins sjá það sem þeir vilja sjá. Utanríkisráðherra lýsir yfir kröfu um rannsókn stríðsglæpa. Hefur utanríkisráðherra heyrt af fjöldamorðunum í Kongó?

Friður hinna 6,464 eldfauga

Hún gerir það ekki endasleppt hún Ingibjörg Sólveig frekar en fyrri daginn. Nú fordæmir hún Ísraela fyrir að verja sig gegn eldflaugaárásum Palestínumanna. Enn og aftur en talað um óhófleg viðbrögð og krafist þess að öryggisráðið grípi tafarlaust inn í atburðarásina á Gaza. Og hvað leggur hún til? Jú, senda friðargæsluna inn til að skakka leikinn. Er hægt að toppa þessa hræsni? Þetta er týpískt sósíalískt viðbragð, sem felur í sér að láta einhvern annan standa undir kostnaði. 

Hringavitleysa Ingibjargar á sér engin takmörk. Hún var ólm í að komast í öryggisráð, þar sem hún ætlaði að taka að sér stjórn. Senda friðargæslulið í allar áttir til að koma útópískum friði um alla heimsbyggðina. Ágætur maður við Harvard benti á fáránleika þess að þjóðir sem hefðu ekki yfir neinum herafla að ráða ættu eitthvað erindi í öryggisráðið vegna þess að ákvarðanir sem teknar eru á annarra kostnað, eru auðveldar ákvarðanir.Hvað skyldi nú þessi friðargæsla vera? Er friðargæsla bara abstrakt hugtak? Ég hefði haldið að friðargæsla væri bara lifandi fólk gert úr holdi og blóði? Ætli það hafi ekki verið það sem Ingibjörg Sólveig hugsaði þegar hún kvaddi friðargæslulið Íslendinga (einn státinn kvenmann) heim frá Bagdad vegna þess að hún (ISG) vildi ekki útsetja Íslendinga fyrir þeim hættum sem fylgja því að vera til staðar á ófriðarsvæðum.

 En með samanbitnar tennur gerir Ingibjörg nú kröfu um að friðargæslulið sé sent inn á Gaza til að ganga á milli. Nú er í lagi að útsetja annarra þjóða menn fyrir hættu. Og fordæmingin er aðeins á annan aðilann. Enginn vafi í hennar huga að það eru Ísraelar sem eru árásaraðilinn. Skítt með það að á síðustu þremur árum, eða allt frá því að Ísrael veitti Gazabúum sjálfstjórnarrétt (sem þeir nýttu til að kjósa yfir sig hryðjuverkastjórn) hefur 6,464 eldflaugum rignt yfir íbúa Ísrael sem næst landamærunum búa. Þeir sem nú deila harðast á Ísraela taka ekkert tillit til þess hvað það er fyrir þá 100 þúsund Ísraela sem búa við þá hættu að fá tilviljanakennt skot í hausinn. Hvenær sem er, nótt sem dag, inni sem úti. Þeir hafa heldur aldrei mótmælt þessum árásum, ekki frekar en þeir hafi mótmælt árásum stjórnarhers Sri Lanka á Tamílana, stjórnarher Súdan á hjarðmenn í Darfúr, stjórnarher Múgabe á varnarlausa mótmælendur í Zimbawbe eða yfirhöfuð stöðug vígaferli víðsvegar um heiminn. Nei, hinir víðsýnu hatursmenn Ísraela sjá aðeins ofbeldi í aðgerðum Ísraela, sem gera það sem er frumskylda hverrar ríkisstjórnar, en það er að verja þegna sína.

Er Samfylkingin í Sjálfstæðisflokknum?

Eða er Sjálfstæðisflokkur og Samfylking gengin í eina sæng. Hvað kemur það eiginlega landsfundi Sjálfstæðisflokksins við hvernig Samfylkingin skipar sitt ráðherralið. Sagði ekki Ingibjörg strax eftir stjórnarmyndun að vel kæmi til greina að hún myndi hrókera eitthvað í ráðherraliðinu á kjörtímabilinu.

Er það núna undir landsfundi Sjálfstæðisflokksins komið hvað hún gerir með sína liðssveit? Verður Geir að sitja og standa eins og hún segir?

Sjálfstæðisflokkurinn á ekki að láta þessa liðleskju skipa sér fyrir verkum. Vestamanneyingar og Ísfirðingar hafa skorað á hann að slíta samstarfinu og boða til kosninga. Sjálfstæðisflokkurinn mun ekki koma vel út úr þeim, en verr kemur hann út úr þessu ógnarsambandi sem hann virðist fastur í um sinn.

Bíða fram yfir landsfund Sjálfstæðisflokks

Hver er ég? ragnhildurkolka 1:6.750.606.383 þegar síðast var talið.

Nú eru síðustu forvöð að nýta sér frelsið. mbl.is ætlar nefnilega að moka flórinn. Kasta út öllum þessum siðlausu nafnleysingjum sem saurgað hafa síður þessa óspjallaða bloggs og fengið það til að roðna í kinnum og hitna á eyrum. Ég er víst í hópi þessara ódæðismanna. Áramótin eru "deadline".

Ég sem hélt að netið, jafnvel moggabloggið væri frelsið í fjölmiðlum, þ.e. svo fremi sem maður er tilbúinn að bera ábyrgð á orðum sínum. Það er í það minnsta sú viðvörun sem við manni blasir þegar ýtt hefur verið á send takkann. Var jafnvel svo einföld að halda að bloggið væri bara svona afþreying eða skemmtun fyrir fólk með takmarkaðan áhuga á maka, líkamsrækt eða sjónvarpi.

Nei, mbl.is lítur á sig sem alvöru miðil, sóðakjöftum skal úthýst ef þeir gangast ekki undir ok þjóðskrár. Gott og vel, af hverju ekki DNA? Hvað hefur þjóðskrá fram yfir DNA mælingu?

Svo lengi sem ég man, og það er lengur en rafræn skráning þegna þessa lands hefur varað, hef ég kynnt mig á ákveðinn hátt - Ragnhildur Kolka, góðan daginn - lengst af án áreitis frá hinu opinbera. Hélt reyndar að hið opinbera væri bara að nuða þetta með millinafnið til að tryggKa sér skattpening. Hélt ekki að fyrirtæki út í bæ gætu beitt einstaklinga útskúfun á grundvelli þessara opinberu gagna. Sérstaklega þar sem enginn fjárhagslegur hagnaður er af samskiptunum. 

En svo kemst ég að því að mbl.is er dauðans alvara og hótar að taka af mér þessa skemmtun af því ég heiti einhverju millinafni sem ég hef aldrei notað og mun örugglega ekki standa á leiði mínu þegar þar að kemur.

mbl.is telur sig ekki getað greint mig frá suðsvörtum almúganum ef ég skrái mig ekki samkvæmt þjóðskrá. Sauðsvartur almúginn er ekki bara þessar 319.756 hræður sem skráðar voru hér á landi þann 1. desember og hver enginn bar nafnið ragnhildurkolka heldur líka þessir 6.750.606. 383 sem hírðust á jarðkringlunni nú fyrir svona uþb hálftíma síðan.

Ég er kannski ekki tilbúin að hengja mig upp á það, en næstum því, að það fyrirfinnist ekki önnur ragnhildurkolka á allri jörðinni. En svona til öryggis þá vil ég baktryggja hálsinn með fyrirvara um að ef svo ólíklega vildi til, þá færi hún varla að blogga á íslensku, sama hversu "imodekommende" mbl.is væri við hana (kannski óráðlegt að kyngreina í þessu tilviki) í upphafi. Ég er með hér til hliðar bók sem lýsir þessari stjórnunaráráttu sem náð hefur taki á mbl.is. Hun heitir The Nanny State og ætti að vera hverjum manni víti til varnaðar.

Famous last words: Af hverju ekki DNA?

Músarholuhugsunarháttur á mbl.is

Þessi snautlega frétt sýnir hvernig Íslenskum fréttamiðlum hugnast að greina frá atburðum  í Írak. Undir fyrirsögn um þinglega afgreiðslu mála varðandi 6000 manna "kokteil" erlendra hersveita kemur ein setning um 140 þús. manna lið Bandaríkjanna, sem gerðir eru að einhverju þurfalingalið sem "fær að vera svolítið lengur" með einhverjum "sérsamningi".   

 Um 140.000 manna lið Bandaríkjahers fær að vera í landinu til loka árs 2011, skv. sérsamningi sem hefur verið gerður.

Það hefði verið stórmannlegra að láta þess getið að atkvæði voru greidd á íraska þinginu í byrjun desember, um áframhaldandi dvöl bandarískra hermanna í Írak. Þessi þinglega meðferð sýnir auðvitað meiriháttar árangur innrásarinnar í Írak eftir erfitt úthald síðustu 5 ár.

Þótt engin tæki eftir þessu hér á landi fór ákvörðun íraks þings verulega fyrir brjóstið á Írönum sem lagt höfðu mikið upp úr að Shiitar höfnuðu áframhaldandi veru Bandaríkjahers. Aðeins fylgismenn al-Sadr greiddu atkvæði gegn tillögunni. Stærsti hluti Shiita, Kurdarnir  og Sunnitar greiddu atkvæði með veru hermannanna. Í raun höfðu Sunnar áhyggjur af því að tímasetningin væri full knöpp. En hún er táknræn og henni er hægt að breyta.

Það hefði ekki átt að fara framhjá mönnum að þingræði hefur verið komið á í Írak; þingræði, þar sem menn með ólíka sýn geta komið sér saman um hvað þjóðinni er fyrir bestu. En á Íslandi búa menn í músarholum og láta sem ekkert hafi breyst.

  

Þingið greiði atkvæði um veru erlendra hersveita í Írak

Sigurður Kári og félagar eru hetjur dagsins

Það var tímabært fyrir þingmenn að hrista af sér doðann og standa með þjóðinni í þessu ömurlega máli. Maður var farinn að trúa því að ekkert yrði gert; við værum ekki bara sett í stöðu hreppsómaga heldur létum við það yfir okkur ganga umyrðalaust. Nú getum við þó horft stolt framan í heiminn, jafnvel þótt við verðum á stöguðum sokkum og bættri brók.

Það var líka tímabært að menn gengju samstíga til verks. Það hefur mikið skort á að þingmenn geri sér grein fyrir að þeir eiga að huga að hagsmunum þjóðarinnar en ekki þröngum flokkshagsmunum í slíkum málum. Það hefði verið betra að þeir hefðu áttað sig á því þegar fjölmiðlafrumvarpið var til umfjöllunar 2004. Frumvarp, upp á eina blaðsíðu, sem hefði getað sparað okkur mikla óhamingju. En þá hugðu menn aðeins að pólitískum keilum og létu hatur á einum manni villa sér sýn. Vonandi eru að renna upp nýir tímar?

Nú er um að gera að bretta upp ermar og hreinsa af okkur þennan smánarblett sem Bretar töldu viðeigandi að klína á okkur.

Fé til málshöfðunar

Heyr, heyr

...og haldið svo áfram. Þetta er eins og talað úr mínu hjarta.

Frekar kosningar en að láta undan dulbúnum hótunum