Ég labbaði upp á Laugaveg um daginn

Hvað er þetta eiginlega með Laugaveginn. Það er eins og allt verði vitlaust í hvert sinn  sem eitthvað á að gerast á Laugaveginum. Nú síðast sprengjuhótun. Er gleðigangan ekki bara yfirvarp, vilja menn ekki bara losa sig við þetta bitbein í eitt skipti fyrir öll.

En án alls gríns, Laugavegurinn er mín gata. Hvern laugardag sem guð gefur (svo til)  tek ég mér göngu upp eftir Laugaveginum - skoða í búðarglugga - skoða mannlíf - kaupi grænmeti í Bónus og rölti svo aftur til baka og fæ mér tvöfaldan expresso á einhverju kaffihúsinu. Ég þekki því Laugaveginn nokkuð vel.

Eins vænt og mér þykir um Laugaveginn sé ég að það má bæta hann. Því hef ég ekkert á móti því að hann taki einhverjum breytingum. Öfgafriðunin sem nú er í tísku er með ólíkindum, en þessi strandaði hvalur sem vinningstillagan er mun ekki bæta Laugaveginn. Til þess ber tillagan of mikinn Chaucesko-svip. Hún kæfir allt umhverfið og brýtur upp smábæjarbraginn sem gerir Laugaveginn svo aðlaðandi.

Hugmyndir Grikkja um fegurð hlutfallanna hefðu mátt vera arkitektunum ofar í huga og stórmennskudraumar rektors Listaháskólans hefðu ekki átt að hafa svona mikið vægi í tillögunni. 

Frá fyrsta degi hefur rektor hamrað á því að Listaháskóli þurfi að vera þar sem kaffihúsin séu - hann þurfi að vera allur undir einu þaki. Hvorug krafan hljómar sannfærandi í mín eyru. Kaffi má drekka hvar sem er og sköpun er hvorki bundin staðsetningu né einstökum húsum.

Sem vekur kannski upp spurninguna; hvers vegna getur allt þetta "skapandi" fólk ekki skapað sér umhverfi til að skapa í?

Athugasemdir

[Beturvitringur, 1.8.2008 kl. 02:05]

Mikið lifandis skelfing þótti mér vænt um að lesa pistilinn þinn.  Þú ert ekki með neinn "æsing"  en segir bara frá: "...þessi strandaði hvalur..."  

Laugavegurinn er að vissu leyti "vegur allra landsmanna" sem aðalgata í einu borg landsins. Vísu eru þínir líkir nánari honum með því að klappa honum daglega.

Eftirlætis umsögnin sem ég hef heyrt um vinningstillöguna:

"Þetta er eins og risastór örbylgjuofn"   !!!!