Fíflaskapur Árna Páls

Það vakti nokkra athygli í vikunnu þegar Árni Páll Árnason þingmaður Samfylkingar lýsti áliti sínu á milljónum kjósenda í Evrópu með því að segja að "Evrópusambandið komi ekki í veg fyrir að fólk kjósi yfir sig fífl" eða e-ð í þá áttina. Þar á Árni Páll  eflaust við að kjósendafífl sem kjósa yfir sig heimóttarfífl er líka að finna í ESB.

Þetta sérkennilega álit Árna Páls var svar við fyrirspurn á kosningafundi, þar sem m.a. efnahagsmál voru til umræðu. Spurt var um hvernig á því stæði að lönd eins og Lettland og Írland o.fl. sem gengið hafa í ESB, ættu við eins gríðarlegan mikinn vanda að stríða og raun ber vitni. Svarið ber með sér að Árni Páll hefur ekki grænan grun um hvað er að gerast í heiminum eða hvernig eigi að taka á því. Í barnslegri einfeldni heldur hann að  allt muni lagast þegar mamma (ESB) tekur hann í sinn náðarfaðm.

Mikill er máttur trúarinnar.

"Fólk er fífl-kenningin" sýnir hve langt Árni Páll og félagar eru frá raunveruleikanum. Við erum stödd í miðri heimskreppu, þar sem hvert land, hver heimshluti hefur lagt sitt af mörkum til að gera vont ástand verra. Við nutum rausnarlegrar aðstoðar Bankaræningjanna , rétt eins og evrusvæðisbúar nutu aðstoðar Seðlabanka Evrópu (ECB) við að koma sér á kné. Ástandið á Írlandi er t.d. ekki nema sjónarmun skárra en ástandið á Íslandi. Þó voru Írar í ESB og ekki nóg með það, þeir höfðu evruna sem gjaldmiðil. Á meðan hér geisar umræða um upptöku annars gjaldmiðils, þar á meðal evru, er svar Árna Páls "Fólk er fífl" bara alls ekki boðlegt.

Er ekki ástæða til að upplýsa fólk um hvernig ECB hefur um árabil mismunað þjóðum evrusvæðisins. Hvernig ECB lækkaði vexti á evrusvæðinu, í algerri óþökk við stærstan hluta þjóðanna sem þátt taka í myntinni, til að bjarga hikstandi efnahagsvél Þýskalands. Á tíma þegar ódýrt lánsfé flaut yfir heiminn. Írland, Spánn, allur Miðjarðarhafsklúbburinn og fyrrum Austantjaldslöndin urðu fórnarlömb ECB og dekurs bankans við Þjóðverja. Þessi lönd voru bundin við vexti ECB og gátu ekkert gert sér til varnar. Byggingar- og framkvæmdabólur spruttu alls staðar óheft upp rétt eins og hér á Íslandi þar sem erlent lánsfé á lágum vöxtum sendi Seðlabanka Ísland langt nef. Afleiðingin er sú sama og á Íslandi, enda hafa bólur tilhneigingu til að springa. Skuldir hlóðust upp og er nú svo komið að skuld Írlands, miðað við landsframleiðslu, er aðeins 0.25% lægri en skuld Íslands. Írland er enn með evru og Írland hefur hafist handa við að ræsta út.

Var það vegna þess að fólk er fífl sem þetta reið yfir Evrópuþjóðirnar? Eða var það vegna þess að hið alltumlykjandi móðurborð var bara að hygla augasteininum sínum? Kreppan skilur þessi lönd eftir á flæðiskeri fjárhagslega og það sem verra er nú eru menn farnir að eygja enn eitt áfallið. Verðhjöðnun er farin að yggla sína brún. Að fá verðhjöðnun ofan í kreppuna er skelfilegt. Samdráttur í framleiðslu í mörgum löndum evrusvæðisins er nú þegar kominn í á þriðja* tug prósenta og atvinnuleysi fer vaxandi og ef ECB heldur óbreyttri stefnu eiga þau lönd sem verst eru sett engan kost annan en að láta evruna róa. 

Hvernig skyldi Samfylkingin snúa sig út úr því?

Við höfum enn vald yfir vaxtavopninu og blessunarlega hina margrægðu KRÓNU. En meðan Samfylkingin heldur áfram að humma fram af sér aðgerðir og láta sem allt verði gott ef við bara göngum í ESB þá getur ástandið aðeins versnað. Í raun mun ástandið bara versnar, því hagalagðahugsunarháttur Vinstri grænna mun koma okkur inn í verðhjöðnunarferli sem mun taka áratugi að losa sig úr.

Það sannast hér, sem margir hafa bent á að þátttökuþjóðir evrusvæðisins eru misjafnar og hentar ekki að deila mynt með þjóðum sem búa við allt annað efnahagsmynstur. Því skyldi evran henta okkur betur en þeim? Sænska krónan réði úrslitum um að Svíar unnu sig svo sköruglega út úr kreppunni. Íslenska krónan mun hjálpa okkur til hins sama.

* lagfæring mín.

Athugasemdir

[Hilmar Gunnlaugsson, 19.4.2009 kl. 03:22]

Ummæli Árna eru þess eðlis að honum ber siðferðisleg skylda til að biðjast afsökunar á þeim. Einörð afstaða margra úr Samfylkingunni til ESB hefur orðið þess valdandi að ég og fleiri kjósum þá ekki. Skynsamlegast og lýðræðislegast í stöðunni er að leyfa þjóðinni að taka ákvörðun um málið í þjóðaratkvæðagreiðslu.

[Ragnhildur Kolka, 19.4.2009 kl. 10:32]

Sæll Hilmar; ég er nú ekki mikið fyrir að fólk sé að biðjast afsökunar á skoðunum sínum. Skoðun Árna Páls að fólk sé fífl segir aðeins að virðing hans fyrir skoðunum annarra er ekki ýkja mikil.

Það er hins vegar sjálfsagt að vekja fólk til umhugsunar á þessari afstöðu Árna Páls, því á grundvelli hennar ætlar hann að þröngva Íslandi inn í hið gapandi gin ESB-skrímslisins.

[Sigurgeir Orri Sigurgeirsson, 22.4.2009 kl. 15:48]

Krónan er nú samt búin að vera. Ég kýs gjaldmiðlafrelsi þar sem hver og einn getur borgað með þeim gjaldmiðli sem hann kýs.

[Ragnhildur Kolka, 22.4.2009 kl. 23:31]

Veik króna er nú samt það sem við þurfum á að halda í augnablikinu. Tenging við evruna eins og ástatt er núna væri fatalt. Við viljum ekki verðleggja okkur út af útflutningsmarkaðnum.

Ég átta mig hins vegar ekki alveg á hvað gjaldmiðlafrelsi fyrirstillir. Could you elaborate?

[Ragnhildur Kolka, 24.4.2009 kl. 20:00]

Þakka þér fyrir innlitið, Hafþór þetta er móttekið.