Friður hinna 6,464 eldfauga

Hún gerir það ekki endasleppt hún Ingibjörg Sólveig frekar en fyrri daginn. Nú fordæmir hún Ísraela fyrir að verja sig gegn eldflaugaárásum Palestínumanna. Enn og aftur en talað um óhófleg viðbrögð og krafist þess að öryggisráðið grípi tafarlaust inn í atburðarásina á Gaza. Og hvað leggur hún til? Jú, senda friðargæsluna inn til að skakka leikinn. Er hægt að toppa þessa hræsni? Þetta er týpískt sósíalískt viðbragð, sem felur í sér að láta einhvern annan standa undir kostnaði. 

Hringavitleysa Ingibjargar á sér engin takmörk. Hún var ólm í að komast í öryggisráð, þar sem hún ætlaði að taka að sér stjórn. Senda friðargæslulið í allar áttir til að koma útópískum friði um alla heimsbyggðina. Ágætur maður við Harvard benti á fáránleika þess að þjóðir sem hefðu ekki yfir neinum herafla að ráða ættu eitthvað erindi í öryggisráðið vegna þess að ákvarðanir sem teknar eru á annarra kostnað, eru auðveldar ákvarðanir.Hvað skyldi nú þessi friðargæsla vera? Er friðargæsla bara abstrakt hugtak? Ég hefði haldið að friðargæsla væri bara lifandi fólk gert úr holdi og blóði? Ætli það hafi ekki verið það sem Ingibjörg Sólveig hugsaði þegar hún kvaddi friðargæslulið Íslendinga (einn státinn kvenmann) heim frá Bagdad vegna þess að hún (ISG) vildi ekki útsetja Íslendinga fyrir þeim hættum sem fylgja því að vera til staðar á ófriðarsvæðum.

 En með samanbitnar tennur gerir Ingibjörg nú kröfu um að friðargæslulið sé sent inn á Gaza til að ganga á milli. Nú er í lagi að útsetja annarra þjóða menn fyrir hættu. Og fordæmingin er aðeins á annan aðilann. Enginn vafi í hennar huga að það eru Ísraelar sem eru árásaraðilinn. Skítt með það að á síðustu þremur árum, eða allt frá því að Ísrael veitti Gazabúum sjálfstjórnarrétt (sem þeir nýttu til að kjósa yfir sig hryðjuverkastjórn) hefur 6,464 eldflaugum rignt yfir íbúa Ísrael sem næst landamærunum búa. Þeir sem nú deila harðast á Ísraela taka ekkert tillit til þess hvað það er fyrir þá 100 þúsund Ísraela sem búa við þá hættu að fá tilviljanakennt skot í hausinn. Hvenær sem er, nótt sem dag, inni sem úti. Þeir hafa heldur aldrei mótmælt þessum árásum, ekki frekar en þeir hafi mótmælt árásum stjórnarhers Sri Lanka á Tamílana, stjórnarher Súdan á hjarðmenn í Darfúr, stjórnarher Múgabe á varnarlausa mótmælendur í Zimbawbe eða yfirhöfuð stöðug vígaferli víðsvegar um heiminn. Nei, hinir víðsýnu hatursmenn Ísraela sjá aðeins ofbeldi í aðgerðum Ísraela, sem gera það sem er frumskylda hverrar ríkisstjórnar, en það er að verja þegna sína.

Athugasemdir

[Baldur Hermannsson, 5.1.2009 kl. 01:30]

Ætli margir hafi áttað sig á þessari tvöfeldni? Þessi pistill er nagli í pólitíska líkkistu Imbu Sollu. Maður heyrir alls staðar að kommarnir eru vonsviknir, því hún virðist ekki hafa vit á neinu sem hún sýslar með - en þeir hafa bara engan annan til að taka við flokknum.

[Helena Leifsdóttir, 6.1.2009 kl. 15:19]

Sæl.
Mikið er ég sammála þér, hvað geta Ísraelar gert annað í stöðinni en varið landið sitt. Hamas liðar nota börn og konur sem skjól sem sýnir hversu miskunnarlausir og grimmir þeir eru.  Hef aldrei skilið  yfirlýsingar ISG varðandi Israel né friðarpotið í kringum hana.

Takk fyrir góða pistla

[Ragnhildur Kolka, 7.1.2009 kl. 09:56]

Takk fyrir innlitið. Vil benda á fantafína grein Vilhjálms Arnar Vilhjálmssonar um barnaníðingana sem nýta sér þjáningar saklausra barna til að koma áróðri sínum á framfæri.