Líf mitt og yndi

Nei, þetta er kannski fulldjúpt í árina tekið, en það eru ekki allir þeirrar hamingju aðnjótandi að fá að eyða starfsdegi sínum í það sem þeim þykir skemmtilegast.  Og er hægt að ímyndað sér eitthvað skemmtilegra en að leika sér með kompliment? Það hefur verið hlutskipti mitt síðustu 15 ár og fyrir það er ég þakklát.

Kompliment eru líklega elsta varnarkerfi líkamans. Hlutar þess eru til staðar í frumstæðum verum eins og ígulkerjum og má því segja að saga þessa merkilega varnarmekkanisma spanni í það minnsta 650 milljón ár. Hugmyndin um að komplimentin séu aðeins varahjól í ónæmissvari réði lengi ferðinni en nú er vitað að kompliment komu langt á undan hinu svokallaða áunna ónæmiskerfi sem sá ekki dagsins ljós fyrr en með tilkomu brjóskfiska. Eins og sést á myndinni hér að neðan samanstendur komplimentkerfið af próteinu sem ýmist hafa bindi- eða tengivirkni eða hvatavirkni sem hrindir af stað ferli sem endar ýmist í frumudauða eða frumuáti. 

Ferlarnir sem komplimentin vinna eftir eru þrír og eru tveir þeirra nokkuð vel þekktir. Þeir eru kallaðir klassíski ferillinn og styttri ferillinn vegna skammhlaups sem hann tekur til að ná fram tilgangi sínum. Sá þriðji er kallaður lektinferill og er minna þekktur. Það er hann sem ég hef verið að vinna með síðustu 15 árin.  

Í dag var síðasti starfsdagur minn hjá hinu opinbera. Ég hef enn nokkra mánuði til að sópa úr hornunum og ganga frá lausum endum en geri það á mínum tíma. Að því loknu ætlar samfélagið mér að gerast grasbít í grænum haga ellinnar..... Ef ég nenni.

Eru þau ekki ótrúlega sæt?

Athugasemdir

[Vilhjálmur Örn Vilhjálmsson, 7.3.2012 kl. 10:55]

Komplíments fyrir að hafa náð þessum "áfanga" í lífinu. Þú heldur áfram blogginu sem ætti að vera á topplistanum á blog.is

[Ragnhildur Kolka, 7.3.2012 kl. 13:28]

Þakka þér fyrir það Vilhjálmur.

Ég er ekki á opinberum lista yfir bloggara sökum þess að ég er í smá stríði við moggabloggið. Er andsnúin því að fyrirtæki "út í bæ" tengi sig við þjóðskrá. Ekkert að því að moggabloggið kanni hver skráir sig inn. Gangi úr skugga um hvort um réttan einstakling sé að ræða, t.d. nafn og kennitölu. En að vera sítengdur tel ég fulllangt gengið.