Að selja heiður Alþingis fyrir völd

Hælbítarnir á Alþingi hafa talað. Ég get hins vegar verið stolt af mínum mönnum. Þeir létu ekki af sannfæringu sinni þótt eflaust hafi verið freistandi að láta Ingibjörgu og Björgvin taka skellinn eftir svik Samfylkingarinnar við Geir. Það hefði verið svo ofurauðvelt að sitja hjá og horfa á Samfylkinguna engjast. En það er í þessari afstöðu sem munurinn á Sjálfstæðismönnum og Samfylkingu felst, þ.e. þeir fyrrnefndu skilja hvenær heiður og prinsipp eru að veði.

Um Vinstri græn og Hreyfinguna þarf ekki að hafa mörg orð. Þar ræður, eins og í öllum málum, öfundarhatrið för. Blettirnir koma upp um hlébarðann.  

Með því að friða Vg og fórna Geir getur Samfylkingin haldið áfram landsölu sinni með velvild og vilja Vg. ESB umsóknin verður áfram á dagskrá og allt það sem henni fylgir. Þetta upplýsandi myndband minnir okkur á hvað okkar bíður nái vilji þessar blóðþyrstu ríkisstjórnar fram að ganga. Um allt Evrópusambandið eru fjárlög til umræðu rétt eins og hér. Alls staðar þarf að skera niður. Brussel hótar jafnvel að taka fjárráðin af þeim ríkjum sem ekki skrúfa nægilega fyrir rennslið úr ríkissjóði. Á sama tíma bendir Daniel Hannan, Evrópusambandsþingmaður, á að á meðan ráðuneytunum í Bretlandi er gert að skera niður sem svarar 25-40% er ESB að krefja Breta um 60% hækkun á framlögum til Brusselbáknsins. Á þeim bæ þekkist ekki að girða sig með sultaról.

Hannan kallar þetta reiðhjóla-aðferðina, þ.e. að halda innstreyminu stöðugu svo báknið falli ekki um koll.

Það er ekki nema vona að Jóhanna og Steingrímur leiti í slíkan félagsskap. Hvorugt vill skera niður og bæði trúa að mjólkin streymi endalaust úr kúnni. Þau átta sig ekki á að fjósið er að tæmast.

Athugasemdir

[Haraldur Baldursson, 29.9.2010 kl. 09:47]

xD stóð sig með miklum sóma og drengskap sem siðlausum xS þingmönnum verður aldrei gefinn.

"taking money out of the productive sector" - Gríðarlega skýr framsetning í einni setningu hjá Hannan.

Mikil blessun væri það ef núverandi stjórn væri gefinn smá vit til að átta sig á því að þau eru að kyrkja atvinnulífið og launþegana í leiðinni.

[Ragnhildur Kolka, 29.9.2010 kl. 10:48]

Eins og þú segir Haraldur, þá setur Hannan puttann á kjarna málsins og vinstri stjórnin á Íslandi fetar nákvæmlega sömu braut. Hið óarðbæra bákn þenst hér út (3500 ný störf hjá ríkinu á síðasta ári) á meðan atvinnulífinu á frjálsum markaði blæðir.