Kominn tími á ærlegt bað

 ICESAVE SAMNINGURINN

mun lengi vera í minnum hafður. Ekki einvörðungu fyrir þær þrælsbyrðar sem hann leggur á landsmenn heldur ekki síður fyrir þann ótrúlega kauðahátt sem fjármálaráðherra Íslands sýndi þegar hann skipaði pólitíska blýklumpa úr einkavinaklúbbnum í samninganefndina. Menn sem enn líta svo á að ríkið viti best og FÓLKIÐ eigi að bera byrðar.

Þegar öllum varð ljóst að þessir kónar höfðu samið illilega af sér ætlaði fjármálaráðherrann að keyra málið í gegnum Alþingi án þess að upplýsa þingheim um samningsskilmálana. Á venjulegu máli kallast þetta svívirðileg myrkraverk og eflaust hefði Steingrímur Joð lagt til enn kröftugra orðalag til að lýsa þessu makki sem hann og Jóhanna leyfðu sér að bjóða kjörnum fulltrúum fólksins í landinu uppá. Það er að segja, hefði hann verið í stjórnarandstöðu, en Steingrímur hefur mörg andlit til að bera; eitt fyrir stjórn og annað fyrir stjórnarandstöðu. Hvorugt frýnilegt. 

Sjálfstæðisflokkurinn tók þátt í að bjarga því sem bjargað varð með vinnu við fyrirvara sem var eina úrræðið sem þingmönnum gafst kostur á í stöðunni. Vissulega verða þeir að greiða fyrirvörunum atkvæði, en þeir eiga að láta ríkisstjórnina sjá um endanlega afgreiðslu málsins. Sjálfstæðismenn eiga ekki að greiða atkvæði með samningi sem þeir áttu enga aðkomu að.

Nú er kominn tími til að skola af sér skítinn sem óhjákvæmilega hefur slest  á þá sem að hreinsunarstarfinu komu og leyfa ríkisstjórnina sitja uppi með subbuverkið.

Sparið ekki sápuna.

 

Athugasemdir

[Björn Birgisson, 27.8.2009 kl. 16:29]

"Sjálfstæðismenn eiga ekki að greiða atkvæði með samningi sem þeir áttu enga aðkomu að." ....................... það er nú það!

Hvernig sápu notar Sjálfstæðisflokkurinn? Kannski milda sakleysislega barnasápu? 

[Ragnhildur Kolka, 27.8.2009 kl. 17:11]

Sjálfstæðismenn áttu enga aðkomu að Icesave samningnum, Björn. Umræðan á þessu sumarþing hefur snúist um það sem Steingrímur gat ekki laumað sér framhjá, þ.e. ríkisábirgðina. 

[Björn Birgisson, 27.8.2009 kl. 17:55]

Í mínum huga er enginn flokkur nátengdari Icesave drullumallinu í heild en Sjálfstæðisflokkurinn. Skil samt ekki af hverju var ekki reynt að manna samninganefndina á breiðari grundvelli en gert var.

[Ragnhildur Kolka, 27.8.2009 kl. 20:20]

Mér er margt til lista lagt en hugarflakk er ekki meðal hæfileika minna. Ég verð því að láta þér eftir að greiða úr þessari villu þinni.

[Björn Birgisson, 27.8.2009 kl. 20:32]

Afsakið, hélt þú værir fjölhæfari.