Mönnum bátana; alla sótrafta á flot

Það gengur mikið á hjá Samfylkingunni  þessa dagana. Mætti halda að þeir eigi ekki von á góðu frá hinni tárvotu rannsókarnefnd sem vonast til að skila skýrslu sinn einhvern tímann fyrir næstu aldamót.

En gerir nokkuð til þótt einn og einn Björgvin falli fyrir borð? Það má alltaf finna annan bassa til að fylla upp í hamingjukórinn. Verra væri ef skýrslan sýndi að Jóhanna hafi haft hönd í bagga með ríkisútgjöldunum í ríkisstjórn Geirs H. Reyndar er útilokað að svo hafi ekki verið þegar tekið er tillit til þessarar 20% hækkunar sem varð á fyrstu fjárlögunum sem sú ríkisstjórn afgreiddi. Slík er gæska Jóhönnu. En Samfylkingin getur verið án Bjögga bassa og Jóhönnu. Samfylkingin á hins vegar við "hér og nú" ímyndarvanda að stríða. Hún hefur veðjað öllu sínu á að Steingrímur tæki skellinn fyrir Iceslave samninginn, sem átti að tryggja að Íslendingar skriðu á hnjánum inní Evrópusambandið. Nú er komin upp ný staða og allar líkur á að Samfylkingin fylgi Vg niður klósettrörið. Það er nefnilega engan bilbug að finn á vilja þjóðarinnar.

VIÐ VILJUM EKKI BORGA ICESLAVE. 

                                              Kennslustund í stjórnmálafræði.

Ólafur Ragnar sá möguleika í stöðunni að rétta sinn hlut með þjóðinni. Samfylkingin er nú að upplifa það sem Framsókn upplifði einu sinni með þeim háæruverðuga og Alþýðubandalagið einhverjum árum síðar. Ólafur Ragnar er enn sami ólafurragnarsistinn sem lætur ekki hugsjónir eða pólitík annarra koma milli sín og ímyndarinnar. Sogist Jóhanna og Samfylking hennar niður rörið þá verður bara svo að vera. Ólafur blómstrar sem aldrei fyrr; heggur til heimspressuna á báða bóga og bregður sér svo á boltann við mikinn fögnuð lýðsins.

Nýja Ísland

Við svo búið mátti Samfylkingin ekki lengur sitja með hendur í skauti. Hagfræðingarnir Þórólfur Matt og Friðril Már mála nú skrattann á veggin ófögrum litum. Eiríkur Bergmann er sendur út af örkinni til að minna þjóðina á stjórnskipun landsins og Ingólfur Bjarni skellir Seðlabankanum í ábúðarfullri "frétt" um lygamerðina sem þar höfðu hreiðrað um sig. Steinunn Valdís flytur frumvarp um Íraksstríðið, sem reyndar var flutt fyrir fáeinum vikum síðan. Svo mikið liggur Samfylkingunni nú á að draga athyglina frá þeirri staðreynd að maður og mús Samfylkingarinnar á þingi greiddi atkvæði með samningnum sem þjóðin ætlar að fella í sinni fyrstu þjóðaratkvæðagreiðslu síðan 1944.

Nú er um að gera að sverja af sér glæpinn. Svavari var fórnað í Kastljósinu í kvöld og þegar Svavari er fórnað þá er Steingrími Joð fórnað í leiðinni. Aðstoðarmennirnir á RÚV tóku að sér að kynna hið frumlega frumvarð Steinunnar Valdísar með því að grilla Halldór Ásgrímsson vegna fornra glæpa. Þegar Halldór vildi ekki gangast við að hafa lagt annað til stríðsrekstursins en afnot að flugbraut og smávegis aðstoð við uppbyggingarstarf stökk Margrét Marteinsdóttir á hann og spurði "En hvað ef við hefðum haft her?"

Er nema von að maður spyrji "En hvað ef fréttamenn ríkisútvarpsins hefðu heila í stað kvarna?"

Þegar svo er komið má segja að smjörklípan sé óðum að verða að fjalli.

Athugasemdir

[Elle_, 9.2.2010 kl. 21:49]

Steingrímur tæki skellinn fyrir Iceslave samninginn, sem átti að tryggja að Íslendingar skriðu á hnjánum inní Evrópusambandið. Nú er komin upp ný staða og allar líkur á að Samfylkingin fylgi Vg niður klósettrörið.

Mikið væri það nú hart ef aðalsökudólgarnir slyppu með því einu að kenna öllum öðrum um þeirra hroða.  Og alltaf versnar ósvífni þeirra ef það var alltaf, eins og það lítur út nú, ætlunin að kenna Steingrími og VG einum um alla vitleysuna ef illa færi.  Steingrímur hefur verið í skotlínunni og hin læðast um eins og mýs - Jóhanna og líka allir öskrararnir í flokknum og ég man ekki hvað þau nú öll heita.  

[Ragnhildur Kolka, 9.2.2010 kl. 22:09]

Þegar pólitískt afl hefur engum hugsjónum að fylgja, öðrum en að skríða í fang ESB, eins og reyndin er með Samfylkinguna,fer það létt með að smokra sér undan ábyrgð.

Steingrímur Joð tók þátt í plottinu gegn Sjálfstæðisflokknum á haustmánuðum 2008, nú hlustar hann á Jóhönnu, Kristrúnu og allan Sf kórinn koma sökinni alfarið á sig á meðan fornvinur hans, Össur, ber nú víurnar í Framsókn.

Mætti segja mér að það fari um kauða núna.